كتب: كريم حسن
كشف الإعلامي أحمد شوبير حارس مرمى الأهلي ومنتخب مصر السابق كواليس تقال لأول مرة عن إصابة إمام عاشور نجم الأهلي مع منتخب مصر خلال تدريبات الفراعنة في كوت ديفوار قبل مباراة الكونغو الديمقراطية.
وتعرض إمام عاشور لإصابة قوية بعد سقوط على الرأس أثناء المران وتم نقله سريعًا للمستشفى وذلك قبل مباراة منتخب مصر ضد الكونغو الديمقراطية التي انتهت بخسارة مصر بركلات الترجيح ضمن منافسات دور الـ 16 من البطولة الأفريقية.
وقال أحمد شوبير: «بالتفصيل هقول لكم اللي حصل في موضوع إمام عاشور والإصابة اللي اتعرض ليها في كوت ديفوار كانوا بيلعبوا (فولي بول) قبل التمرين كنوع من أنواع التسخين وفي كرة عملها دبل كيك بحماس شديد وقع على دماغه ورقبته».
وأوضح أحمد شوبير: «شاء الله أن يكون أول لاعب بجواره حمدي فتحي فنيم إمام على جنيه اليمين والحركة دي فرقت جدا معاه، وطار دكتور محمد أبوالعلا اسبرنت سريع وطلع له لسانه قبل ما يبلعه بجهاز زي اللبيسة كده، وكان الوضع صعب جدا وإمام طلع رغاوي من بقه فاللاعبين انهاروا وقالوا إمام بيموت».
وتابع شوبير: «بسرعة جريوا بإمام عاشور على المستشفى ومقعدوش يفتوا في الملعب واللاعبين مش قادرين ياخدوا نفسهم من الرعب عليه والقلق، لكن وهو بيتقلب قال اه، وبعدها فيتوريا كان عايز يكمل المران ويعمل تقسيمة فاللاعيبة سابوا التقسيمة وانفعلوا عليه لغاية ما جالهم تليفون من المستشفى طمنهم على حالة إمام عاشور».
وأضاف شوبير: «عايز أقول لكم إنه بعد ما فاق كمان مراته كلمته فقال لها أنت مين لغاية ما بدأ يستعيد وعيه، والغريب إنه تاني يوم كان عايز يلعب وتوسل للجميع ومسؤولي المنتخب وقال لهم همضي إني هلعب على مسؤوليتي لكن طبعا مفيش استهتار أبدا في موضوع سلامة اللاعبين سواء بلوائح الفيفا أو من جهة مسؤولي بعثة منتخب مصر».
