أول تعليق من شوبير على كلام زوجة على معلول علق الإعلامي أحمد شوبير على كلام زوجة اللاعب التونسي على معلول حول رحيلة عن الأهلي
كتب: كريم حسن
قال أحمد شوبير عبر قناة الأهلي
لو زوجة النجم الكبير علي معلول كتبت كلمتين وماله؟ ده حقها، وعلي معلول ليه حق كبير وكتير علينا ده ياما سجل وصنع واخلص وحاجات كتير ياما قدمها للأهلي، اللي كابتن رمضان قاله ان رغم اصابة علي معلول لكنه موجود معانا بعقده ومكمل هذا الموسم وقال انه لو معلول رجع وحالته كانت كويسة وارد يكمل ويجدد طبقا لحالته، زي السولية كده بيجدد سنة بسنة، ونفس القصة بالنسبة لمعلول الموضوع راجع لحالته، لكن لا حد قال الأهلي هيستغنى عن معلول ولا حد قال معلول مش هيكمل في الأهلي، ده الناس في الأهلي مستنين على أحر من الجمر عودة معلول وان شاء الله علي يرجع بالسلامة ويحط رجله في الملعب ويثبت انه سليم وهتلاقيه موجود وبيلعب باك ليفت ووينج ليفت وهاف ليفت وبيلعب كل حاجة، علي معلول ايقونة الكرة الاهلاوية، معشوق ومحبوب الجماهير الاهلاوية، ده معلول اللي الكل عارف ايه اللي اداه للنادي الأهلي، ورسالة للفاضلة زوجة علي معلول بقول لحضرتك علي معلول في قلوب الجميع، مجلس ادارة الأهلي والجهاز الفني واللاعبين والجمهور والاعلاميين وكل ما يمت للنادي الأهلي بصلة هو عاشق لعلي معلول، ويهيم شوقا وعشقا وحبا في علي معلول
