بخبى الهم من صدرى
سكن في العجز بدري
ملامح شاب فى الثلاثين
أبان شايب ولا الستين
حلمنا محتاج فعلا تفسير
مش عارفين رايحة الدنيا لفين
قولتنا.احلمو…افرحو….غنو
واخطفو من الأيام واتمنو
احلمو…احلام البني آدمين
قولتنا اكتبوا احسبوا ارسموا
أحلامكم للأيام ……تفصيل
ضيعتوا الصبر ورا الأوهام
وبقينا نكعبل فى الأيام
اكلين شاربين نايمين صاحين
عايشين فى الدنيا ومش عايشين
شكلنا أوهام أحلام
ودقايق ساقطة من الأيام
شكلنا بقى يشبة ناس تانين
أحلام للى الحظ لعب..له
فى الدنيا وعلى بابه كتب..له
حتى الأحلام بقى ليها كلام
قبل ما تتحقق تسأل مين
ليك عندى كيان ووجود ومكان
طب جاي وجايب الوسطة منين
وكمان حلمنا محتاج وسطة
الدنيا بقت علبة باسطا
ما يعش فيها غير الحلوين
لو جاى جايب وياك وسطة
الجاهل يقوللة يا باشا
والمتعلم روح ياسطا
هتروح فيها فين انتا يا مسكين
يللى متملكش إلا هدومك
ورغيف عيش ميكفيش يومك
وتنام مظلوم وتقوم محروم
من نعمة حلم البني… أدمين
واللى بيسألنا عن الأحوال
بنقول صابرين عايشين راضين
وقليل الحيلة حا يشكى…. لمين
طول عمرنا نرسم فى الأحلام
وبتطلع لوحة لناس ….تانين
نفسنا فى أحلام البنى….أدمين
أحلامنا جوا قلوبنا شباب
وعلى وشوشنا…بشيب الستين
فين هى …..أحلام البنى…….أدمين
كلمات الشاعر الغنائي
رامز وليد
من ديوان(أحلام ضايعة بقالها سنين)
