أنا الطيب أنا الشقيان
سكني اللهم من بدري
بقوم قبل الأوان بأوان
على رزقى أقوم وأجرى
ولو يوم ضاق علي الحال
بحط إيدي على صدري
وأقول يا جابر الأحوال
تهونها على الغلبان
ما أنا الطيب أنا الشقيان
وسر حياتي لقمة عيش
وموجود يوم وعشرة مفيش
وساعات يصعب علي الحال
أنا الحافظ حدود الله
وعشمى كله وجه الله
ولو جار حد بيا فى يوم
ولا بعتب عليه ولا ألوم
ما أنا الطيب أنا الشقيان
وموجود فى الحياة مظلوم
أنا إللى سر أيامه
بتبدأ فى الحياة مهموم
مملوكشي من حيط الدنيا
غير لقمة عيش وراحة بال
ما أنا الطيب أنا الشقيان
أنا المحسوب على الدنيا
وفى شهادة الميلاد غلبان
سعادة البيه رغيف العيش
أنا جيتلك وبتأسف
وعشمى أسفى يوصلك
ولو يوم مرة زعلتك
مابستغناش فى يوم عنك
لا عندى قصور…… راجع مكسور
وأيه بس إللى حاصلك
راجع من فقري وماتلومنيش
بحق العشرة ما تسيبنيش
وأحلام الفقير فيها إيه
غير هى بس حبة عيش
بحق العشرة ما تعلاش
ما تتكبرش إهدى……. بلاش
وليه تنسي إحنا كنا صحاب
بندى لبعضنا الأسباب
لعلتنا وحيرتنا
فى وجودك عمرى ما أحمل هم
أنام وأقفل علي الباب
أنا الغلبان وبتأسف
على غلطى إللى معملتوش
عايش طول عمرى وبحسس
على حلمى إللى ماحلمتوش
وأخر حلم يطلع إيه
غير هو رغيف العيش
سنيين بمودتك فيها
أنا وأنت نقضيها
بحتة جبنة ورغيف عيش
(رغيف العيش)
صاحبنا وكنا بنعزو
سنيين نتباهى من عزو
خلي بينا وسحب عزو
وليه بس الزمن وازو
وفرد جناحاته على الغلبان
دا كان هو الساتر فى البيت
وقت الضيقة بيعديك
ولما الدنيا تيجى عليك
يواسي فيك بكل أحوال
ومن غيره أبات مهموم
أنا خايف أقوم من النوم
ألاقيني من الصاحب محروم
ما أنا الغلبان وما بيديش
من الدنيا غير رغيف العيش
الرحمة حبة على الغلبان
المتعلق بلقمة عيش
