شوبير: تم توقيع عقوبة على محمود كهربا مهاجم الأهلي بسبب تصرفه عقب انتهاء لقاء فاركو
كتب: كريم حسن
وجه الإعلامي أحمد شوبير، حارس مرمى الأهلي ومنتخب مصر السابق، رسالة تحذير إلى مهاجم الأهلي محمود عبدالمنعم كهربا بعد أزمته الأخيرة عقب مباراة فاركو في الدوري.
وقال أحمد شوبير: «كهربا بعد مباراة فاركو عمل مشكلة كبيرة الراجل كولر عمل تدريب بعد نهاية المباراة للاعبين اللي مشاركوش سأل فين كهربا قالوا له بيقول رجلي حاسس بتقل فيها، فكولر قال يعني هو كان احتياطي لو كان نزل لعب كان هيلعب ولا هيقول رجلي تقيلة، وفيه لائحة هيتم تطبيقها على كهربا وهيتعاقب»
وتابع شوبير: «أنا هنا عايز أقول لكهربا بالتحديد يا عم كهربا كلنا بنقرا إن أنتوا كفريق هتكرموا موديست عشان خلاص ماشي ومفيش غير حضرتك ووسام أبوعلي يعني 2 بس وساعات بيستعمل طاهر محمد طاهر وبيرسي تاو في رأس الحربة، فالراجل موديست ماشي فبتعمل مشكلة ليه دلوقتي يا كهربا».
وأوضح شوبير: «وسام أبتعلى بيتصاب أكتر من مرة وعرضة للإصابة والناس بتحبك وبتقف جنبك بس لو أنت موقفتش جنب نفسك يبقى كل سنة وانت طيب الناس هتدافع عنك مرة واتنين وتلاتة والاهلاوية واقفين جنبك وجنب إمام عاشور بس لأ اوعى تأمن جمهور الأهلي يطلعك السما وبعدها ممكن يخسف بيك الأرض هو عنده الأهلي والنادي رقم واحد».
وأضاف شوبير: «أنا عجبني جدا أفشة كان نجم المباراة قدام الداخلية وقدام فاركو الراجل ملعبوش خلاص عادي معملش مشكلة ولا عمل حاجة، فده النظام واللي مش عاجبه هو حر».
