طول ما لسة فى الحياة
ناس رافعة إيدها لربنا
بتطلب رضاه
باقية الحياة
ما تقولشى تاهت خطوتك
ما تقولشى ضليت سكتك
قوم دارى دمعة بضحكتك
راح تبقى إيه لو شادتك
خطاوى يأس فى سكتك
وخسرت إحساسك معاه
بيك ومن غيرك كدا
باقية الحياة
حلو الطموح……ونكمله
قوم يلا روح
وإمشى الطريق من أوله
إتعب معاه….. وإستحمله
توضح معاك رؤيا الطريق
ويبان بسيط من أوله
إحلم وحلمك عيش معاه
إطلق طموحك للحياة
لو يسبقك حاتحصله
واليأس بإيديك إكسروا
الصعب جواك قوله لا
حلوة الحياة…..حلوة الحياة
وطول ما لسة فيه نفس
وناس توحد ربنا
ودموعنا تنزل فى الألم
ونحس شكوى إللى إتظلم
ونفرح لحاجة تسرنا
عايشين بنحمد ربنا
مش باقى غير بس الرضا
بيك ومن غيرك كدا
باقية الحياة…… ومكملة
صعبة الإرادة……. وممكنة
طول ماحنا عايشين حلمنا
شوف سكتك وإحسب لها
وإكتب لها …..وإرسم لها
هات الورود وإفرش لها
طريق على جسر الأمل
وقوم بروحك…….روح لها
حاتلاقى فيك حلم إكتمل
وطول ما لسة فينا روح
وأيامنا خالية من الجروح
وقلوبنا شاكرة لربنا
صعبة الإرادة وممكنة
طول ماحنا عايشين…. حلمنا
باقية الحياة ومكملة
