شبه ضايع منا حاجة
ولا لسة باقية حاجة
ولا فيه جوانا حاجة
محتاجلها ألف حاجة
قلت ضحكه وابتسامة
واللقي في معنى السلامة
ويبلغك منا السلامة
بس برده ناقصة حاجة
معنى منطوق السعادة
والإعادة فى الإفادة
بس كل دا ولا حاجة
عقلى بيفكر فى بكرة
واللى بيحب ويكره
إللى جوا فى قلبه سِمه
واللى حامل كل همه
واللى شال الهم عنه
واللى قال الرزق قسمة
واللى مشغول بالعبادة
واللى راضى بأى حاجة
واللى طمعان فى الزيادة
بس ناقص برده حاجة
واللى جار على حق جاره
واللى جنبه مريض وزاره
واللى رحمة ربه عنده
هى ديه اعظم عبادة
بس برده ناقصة حاجة
واللى ليه صاحب مخاصمة
تيجى تسأله طب وليه
أصل كان طمعان يقاسمه
فى حلم كان بنيه بإديه
لما حافظ على إللى ليه
صحبه بقا مقلوب عليه
يا لاه نشرب على الصداقة قهوه سادة
بس برده ناقصة حاجة
اللى حاسس جوا قلبه بإنكسار
اللى رافض حتى معنا الإختيار
اللى مش قادر يفرق
حكمة اليل من النهار
واللى مجروح جوا قلبه
واللى وهم الحب غالبة
لما حس ان إلى حبة
سالبه رد الإعتبار
وإكتفى بالإنكسار نام ومدد على الوساده لسه ناقص فينا حاجة
دنيتك مش بس دنيا هات وصد
دنيتك دنية محبه وهات وخد
مين الى قال إن عيب جواك تحب
الحياة أصلاً عبارة عن موده وشوق وحب الى جمعته من الأيام روايح
هى باقية بس بكرة انت الى رايح
زى ساقية فيها صوت المياة سارح
أحلى معنى تعيش عليه
أحلى حلم تحس بيه
إنت عارف هو إيه
حب كل الناس وسامح
هى ديه الحاجة إلى ناقصة
جوانا معنى ( التسامح. )
