كتب: كريم حسن
رفع الإعلامى أحمد شوبير حارس مرمى الأهلى ومنتخب مصر السابق الغطاء عن قصة غياب و أزمة لاعب وسط الفريق الكروى الأول بالنادى الأهلى إمام عاشور مع المدير الفنى للفريق مارسيل كولر قبل مباراة صن داونز.
وكان مارسيل كولر أكد خلال بعض التصريحات أنة استبعد إمام عاشور من قائمة الأهلى فى مباراة صن داونز، لأسباب تعود لإصابتة وبعدها كشف الأهلى فى بيان رسمى أن اللاعب يعانى من إصابة برشح والتهابات فى الكاحل.
وأوضح أحمد شوبير فى تصريحات إذاعية صباح اليوم الأحد: «باختصار كده هقول لكم كل قصة إمام عاشور ومشكلته فى الأهلي، هو إمام مكانش عايز يسافر تنزانيا فى مباراة الذهاب مع سيمبا عشان خايف من تجدد الإصابة، لكن مستر كولر قال له تعالى وأنت كويس والدكتور مطمنى عليك، فإمام عاشور فكر إنه هيلعب هناك قدام سيمبا لكن كولر محطوش فى التشكيلة الأساسية ولا نزل احتياطى وده ضايق إمام.
وأشار شوبير: «لما رجع الأهلى مصر إمام عاشور لم يتدرب بجدية تراجع فى التمرين وادلع شوية وكولر معجبوش، وقال لمستر كولر هشوف الدكتور يشوفنى والقصة والحدوتة، فجت مباراة العودة مع سيمبا فكولر لم يضعه فى التشكيلة وخلال المباراة معملش تغييرات باستثناء موديست فى نهاية المباراة بناء على طلب كهربا فزعل إمام عاشور أكثر إنه لم يشارك.
وأضاف شوبير: من هنا كان قرار كولر إنه إمام عاشور ما يسافرش وطبعا فى الأهلى قالوا إن فيه تقرير طبى وأنا همشى وراه التقرير الطبى وهقول إنه مصاب.
واختتم شوبير: عموما أتمنى الموضوع ده ينتهى وإمام لاعب تمتع بحب الجمهور بعد ما كان الجمهور زعلان منه، فمش من السهولة تستبعد لاعب زى ده وما ينفعش برضه لاعب زى ده يخرج من الإطار العام للنادى الأهلى ونظامه دى قصة إمام عاشور عشان تبقى واضحة للجميع
