بدور بين وشوش الناس
وشى ما يقبلشى يخدعنى
وشى إتربى على الإخلاص
أقول الأة ويسمعنى
من كتر ما بنخدع فى الناس
بقى الصدق إللى يوجعنى
وطول ماحنا على الحياة عايشين
هنقابل من الخلايق ناس
الدنيا حبة ناس وعايشة بلاش
بترزع شرها فيها
غيتها جرح الناس ما ليها أساس ا. بتحاول تنسى ماضيها
مابنية على الأوجاع حياتها خداع
قانونها فى الحياة يا وداع
وناس حياتها بالمَرة
عايشة على الحلوة والمرة
وبتداوى فى جراح الناس
ما فرحوش يوم ولا مَرة
وناس تحسها نسمة صيف
دايماً تشيل ليك المعروف
بريئة جوا القلب شريف
تقول على الدنيا إحنا ضيوف
وناس تشوفها بمليون وش
عليها ضحكة غريبة تغش
وناس بسيطة وأعلى ما فيها
تتمنى من ربنا يديها
عطف ومحبة ود الناس
وناس حياتها بس تعيش
دايماً بتاخد ولا تديش
وناس تصلى على السجادة
تقول الإيمان واخد بزيادة
وتملى توعد ولا توفيش
وناس بتسرق أحلام ناس
المر بيحطوه فى الكاس
ويزيدوا ياما فى جرح الناس
وناس بتظاهر بالعفة
وترسم الضحكة على الشِفة
جوا القلوب دول أسوء ناس
وناس يا عينى يا حول لله
مش طالبة غير الرضا م لله
عايشة الحياة بكل بساطة
قانونها الدنيا منفاتة
حانروح وناخد ويانا إيه
مترين قماش ولا تلاتة
وسيرة حلوة مابين الناس
الدنيا باقية لرب الناس
طول عمرى وأنا مخدوع فى الناس
كلمات الشاعر الغنائي رامز وليد
