بلاش يصعب علينا الحال
عشان روحنا ماتتعبشى
ولو نتفقد الأحوال
على روحنا مانصعبشى
القرش ساد فوق العباد
وبقوا عبيد للمال وجاهوا
والحق تاه وسط الحياة
وتفرقوا البشر وتاهوا
الكل عاش يبحث فى حيلة
أو وسيلة فى الحياة
ازاى يكون بين يوم وليلة
وصل لحلمه ومبتغاه
يوصل لفين ويروح لمين
وايه إللى بيكمل معاه
وبقينا نتصنع حجج
ميهمناش مين اتوجع
ولا مين بيعد ولا مين رجع
كل إللى لينا المصلحة
وازاى وايه راح نستفاد
شئ حلو جوانا انكسر
وبقينا اشبه بالبشر
ولاد الأصول عملو الأصول
والعيب فايتهم
وأهل الملام قاعدين ملام
بقوا ليل نهار جايبين سيرتهم
ولاد الحرام عليوا المقام
وبكدبهم وصلوا لغايتهم
المال مَلك فينا امتلك
ساد فوق حياتنا
بقا دين وسايق وسط الخلايق
ولا حد وياه شئ فرق
أهل المبادئ والقيم
بقوا ذكرى معدومة النسب
واهوا دا قدرنا إللى انكتب
النار تئيد جنب الحطب
